من فترة كنت بفكر أشتري لوالدي الله يحفظه كاميرا لأنه مرة كان قالي يايوسف بدي كاميرا ديجيتال ومحتار في هذا الأمر عشان عملية طباعة الصور وهل يوجد في أبها معامل تطبع هذه الصور وسألني عن التكلفة وعن أمور كثيرة.
نسي والدي الموضوع لأنها مش بتلك الضرورة أو الأهمية بالنسبة له – لكن أنا بقيت في بالي | لعلي أكسب بها رضاه ودعوة منه لعل الله يرفع بها شأني 
غير أني مللت من كثرة شراء زجاجات العطر له – قررت أن تكون هذه المرة هدية من نوع آخر.
كاميرا ديجيتال مع طابعة | فكرة!
صارلي فترة بسأل عن كاميرا وطابعة بس كان صغر حجم الطابعة بيحيرني وبيخليني أشك في قدراتها – مش عارف ليش! وكثرة الأنواع وكثرة العروض تصيب الواحد بالدوران والتصلب في المخ من كثرة التفكير! وكأن ما بقي شركة في العالم إلا صارت تصنع كاميرات وطابعات!
لا تستغربوا لو لقيتوا كاميرا من نوع ديتول!
المهم رحت امبارح في الليل سوق الكورنيش في الليل ودخلت محل عبد الواحد بيتهيألي هو وكيل كاميرات نيكون وكانون ومتخصص في مجال الكاميرات
فسألت موظف اسمه “هاشم” | مؤدب جدا ومعاملته طيبة جدا | ايش أحسن في الطباعة الكانون والا الإتش بي؟ فقالي بكل ثقة طبعا كانون!
فقلتله ساخرا سبحان الله! انا سألت في إكسترا موظف من إتش بي نفس السؤال وقالي برضو طبعا إتش بي! إيش أعمل في حالي أنا؟
فقالي ياأخي كانون منذ الأزل معروفة في الكاميرات وهذا تخصصها – فقلتله هذا مش معناه ان إتش بي مش ممكن تتفوق عليها!
فقالي انت شفت أكيد صور إتش بي وتعال شوف صور كانون! “واثق من نفسه”
فقلتله طيب ماشي الحال – وبيني وبين حالي قلت هو أصلا لو إتش بي حتى أحسن والدي ما حيقتنع ولا حينبسط إلا بالكانون لأانه فعلا إسمها في الكاميرات أقوى ومهما كانت روعة الصور من أي كاميرا سيبقى رأيه أن الكانون هي الأفضل! وبصراحة مش عشان والدي كبير في السن فقط بيعتقد هذه المعتقدات وكمان أنا والله لو كل شركات الدنيا تتقدم في مجال الكاميرات ما برتاح نفسيا إلا لما تكون كاميرتي كانون! “أو سوني أريكسون – عشان خاطر واحد صاحبي”
المهم قالي عن باكج “عرض” عن كاميرا كانون 6 ميغا بيكسل مع طابعة selphy مع جراب كاميرا مع خمس ورقات وحبر لخمس صور ب 1299 ريال فقط
ملحقات الكاميرا | إضغط هنا
فكرت كثير في الموضوع وقارنت كمان بين إتش بي وكانون بتكلفة طباعة الصورة – ففي إتش بي تكلفتنها بالضبط ريال واحد “حسب كلام رجل المبيعات” أما مع كانون فتكلفة الصورة والواحدة 1.8 ريال
ونسيت أقول كمان اني شفت نفس العرض اللي قالي عنه هذا “في إكسترا” بس بدون الجراب والكاميرا 3.1 ميغا بيكسل ”على ما أذكر” وبنفس السعر! وشكل الكاميرا تعيس جدا بيذكرني بالهدايا اللي كانت توصلنا من سن توب!
المهم قلتله أنا بدي تعملي تجربة عملية على الكاميرا وعلى الطابعة ولا تزعل مني لو قلتلك إني ما حشتريها أو ما أعجبتني!
فقالي لا ما حزعل بين البايع والشاري – فكملت أنا – “يفتح الله” بس مش حابب أخليك تفك الحبر وتفك الورق وتتعب معي وآخذ من وقتك وفي الأخير ما أشتري فقالي لا أنا متأكد انك حتشتري!
قلتله توكلنا على الله – وريني
بصراحة الكاميرا طلعت مذهلة بشكل مش طبيعي والمذهل أكثر طباعة الصور – والله أنا ما كنت حصدق لولا إن الورقة إنطبعت قدامي! وفيها صورتي البهية!
فأول ما شفت الصورة قلتله يللا رجعها في العلبة وطلعلي الفاتورة
اشتريتها وإشتريتلها كارت ميموري 2 قيقا و3 مغلفات صور مع حبرهم كل مغلف 36 صورة “قربت أخلصهم بس في التجارب”
واليوم أخوي نبيل شافها عندي ولولا ان الوقت متأخر جدا لذهبنا بدون نقاش لشراء واحدة ثانية – والحقيقة أنا كمان بفكر أشتريلي كمان وحدة لي بدل الدبابة اللي عندي (Canon | Power Shot G5)
المهم أنا متأكد إن أبوي حينبسط عليها:) قولوا يارب!
